Search This Blog

विस्थापन का गीत

(महाजन फील्ड फायरिंग रेंज के निर्माण में बलिदान हुए 34 गांवों को समर्पित)

हरियल खेजड़ल्यां री छांव
लारै छूट्या म्हारा गांव
बिछड्या बाळपणै रा हेत
सोनल सुपनां रलग्या रेत
म्हारी, बिधना तूं आछी रे करी
बिधना तूं आछी रे करी....

गांव गवाड़ी खेती बाड़ी
तन्नै छोडणी पड़सी लाडी
चूल्हो चौको बरतन भाण्डो
छान्न झूंपड़ी चकले लाडी
राज बणासी रेंज अठै तो
फौजां त्यार है खड़ी रे
तोपां त्यार है खड़ी
बिधना आछी तूं करी....

माऊ रोई, काकी कूकी
घर आंगणियो कुरळायो
टसकण लागी च्यारूं कूंटां
चौक चौबारो चिरळायो
बाखळ में अरड़ाई गायां
भूखी, तीसी ही खड़ी रे
तूड़ी नीरो नीं चरी
बिधना आछी तूं करी....

आडो बोल्यो भीतां बोली
बोल्या घर रा थान
साळ रसोई भेळा बोल्या
राखी थारो ध्यान
पड्यो पलिण्डै पाणी बोल्यो
जांवतां, दीबड़ी भरी रे
तेरी दीबड़ी भरी
बिधना आछी तूं करी....

प्रीत पाळती इण धरती में
सत पीढ्यां रो सीर
नैणा सूं अंबर घट बरसै
होवण लाग्या व्हीर
नाथू दादै दी आसीसां
आंवतो जांवतो रई रे
प्रीत नै गांवतो रई
बिधना आछी तूं करी....

रण खेतां में प्राण होमणो
मुरधर रा सैनाण
हंसतां हंसतां सीस सूंपणो
इण माटी री स्यान
देसांहित म्हे सूंप दिया है
म्हारा चौंतीस गांव
माटी रळग्या ज्यांरा नांव
बिधना लाग्या थारा दांव
हरियल खेजड़ल्यां री छांव
लारै छूट्या म्हारा गांव......

-रूंख

No comments:

Post a Comment

आलेख पर आपकी प्रतिक्रियाओं का स्वागत है. यदि आलेख पसंद आया हो तो शेयर अवश्य करें ताकि और बेहतर प्रयास किए जा सकेंं.

पृथ्वी मील की लोकप्रियता ने बिगाड़े सारे समीकरण, जेजेपी रच सकती है नया इतिहास

  प्रचार के अंतिम दिन शहर में घर-घर पहुंचे जेजेपी कार्यकर्ता सूरतगढ़, 23 नवंबर। चुनाव प्रचार के अंतिम दिन जननायक जनता पार्टी के सैकड़ो कार्य...

Popular Posts